भक्तपुर। अस्पताल स्थापना भएको २७ वर्षपछि मध्यपुरथिमि नगरपालिकाद्वारा सञ्चालित नेपाल–कोरिया मैत्री नगरपालिका अस्पतालमा १५ शैयाको अत्याधुनिक सघन उपचार कक्ष (मोडुलर आईसीयू) सञ्चालनमा आएको छ।

मध्यपुरथिमि नगरपालिकाका प्रमुख एवं अस्पताल व्यवस्थापन समितिका अध्यक्ष सुरेन्द्र श्रेष्ठले अस्पताल परिसरमा आयोजित कार्यक्रममा मोडुलर आईसीयूको उद्घाटन गर्नुभएसँगै सेवा सञ्चालनमा आएको हो।

आईसीयू सेवा सञ्चालनमा आएसँगै भक्तपुर तथा पूर्वी क्षेत्रबाट उपचारका लागि आउने गम्भीर अवस्थाका बिरामीले अत्याधुनिक सघन उपचार सेवा खोज्दै काठमाडौंका अस्पताल धाउनुपर्ने बाध्यता कम हुने नगर प्रमुख श्रेष्ठले बताउनुभयो। उहाँले गम्भीर प्रकृतिका बिरामीको उपचार तथा शल्यक्रियापछि आवश्यक सघन उपचारमा समेत आईसीयू सेवा प्रभावकारी हुने विश्वास व्यक्त गर्नुभयो।

अस्पतालले प्रदान गर्दै आएको गुणस्तरीय स्वास्थ्य सेवामा आईसीयू सेवाले थप योगदान पुर्‍याउने बताउँदै श्रेष्ठले देशभरका नगरपालिकाद्वारा सञ्चालित अस्पतालमध्ये नेपाल–कोरिया मैत्री नगरपालिका अस्पतालले सुविधा सम्पन्न र ठूलो अस्पतालका रूपमा पहिचान बनाउन सफल भएको उल्लेख गर्नुभयो। स्वास्थ्य बीमाअन्तर्गत दाबी भुक्तानी गर्ने अस्पतालमध्ये पाँचौँ ठूलो अस्पताल बन्नु गौरवको विषय भएको उहाँको भनाइ थियो। नगरपालिकाले आगामी दिनमा विशेषज्ञ स्वास्थ्य सेवासमेत विस्तार गर्दै लैजाने उहाँले बताउनुभयो।

अस्पतालमा उपचारका लागि आउने बिरामीको संख्या हरेक वर्ष बढ्दै गएको उल्लेख गर्दै नगर प्रमुख श्रेष्ठले हाल दैनिक १ हजार १०० भन्दा बढी बिरामीले सेवा लिइरहेको जानकारी दिनुभयो। उहाँका अनुसार अस्पतालको नयाँ सुविधा सम्पन्न भवन निर्माणको अन्तिम चरणमा पुगेको छ। उक्त भवन सञ्चालनमा आएपछि बिरामीले थप सुविधा प्राप्त गर्नेछन्।

अस्पतालले छिट्टै मुटुरोगसम्बन्धी (कार्डियोलोजी) सेवा सञ्चालन गर्ने तयारीसमेत गरेको छ। मुटुरोगका बिरामीलाई सहज सेवा उपलब्ध गराउने उद्देश्यले ए ग्रेडको एम्बुलेन्स सञ्चालनमा ल्याउने तयारी भइरहेको उहाँले जानकारी दिनुभयो।

नगर प्रमुख श्रेष्ठले अस्पतालले घरदैलो स्वास्थ्य सेवा सञ्चालन गर्दै आएको बताउनुभयो। पोर्टेबल अल्ट्रासाउन्ड मेसिन खरिद गरी नगरका विभिन्न वडामा पुगेर स्वास्थ्य सेवा प्रदान गरिएकाले अस्पताल मुलुकका १० उत्कृष्ट सामुदायिक अस्पतालमध्ये पर्न सफल भएको उहाँको भनाइ थियो। अस्पतालले चाँगुनारायण अस्पतालमा समेत विशेषज्ञ सेवा उपलब्ध गराउँदै आएको उहाँले बताउनुभयो।

कार्यक्रममा मध्यपुरथिमि नगरपालिकाका उपप्रमुख विजयकृष्ण श्रेष्ठले चार वर्षअघिसम्म घाटामा सञ्चालन भइरहेको अस्पताल गुणस्तरीय सेवा तथा सुविधाको विस्तारसँगै अहिले नाफामा सञ्चालन हुन थालेको बताउनुभयो। अस्पताललाई विशिष्टीकृत स्वास्थ्य संस्थाका रूपमा विकास गर्ने प्रयास भइरहेको उल्लेख गर्दै उहाँले अत्याधुनिक आईसीयू सेवाले सघन उपचारको अभावमा बिरामीले ज्यान गुमाउनुपर्ने जोखिम न्यूनीकरणमा सहयोग पुग्ने विश्वास व्यक्त गर्नुभयो। उहाँले अस्पताललाई देशकै उत्कृष्ट अस्पतालका रूपमा विकास गर्ने लक्ष्य रहेको बताउनुभयो।

कार्यक्रममा अस्पताल सञ्चालन समितिका सदस्य हरिदास प्रजापति, अस्पतालका कार्यकारी निर्देशक डा. डिके रौशन, नगरपालिकाका प्रमुख प्रशासकीय अधिकृत भोजराज घिमिरे, जिल्ला जनस्वास्थ्य कार्यालयकी प्रमुख अञ्जना खड्का तथा नगर प्रवक्ता कृष्णहरि आचार्यलगायतको उपस्थिति रहेको थियो।

आईसीयू सेवा सञ्चालनमा आएसँगै स्थानीय बासिन्दाले आफ्नै क्षेत्रमा तुलनात्मक रूपमा कम शुल्कमा गुणस्तरीय सघन उपचार सेवा प्राप्त गर्न सक्ने अपेक्षा गरिएको छ।

दैनिक ११०० भन्दा बढी बिरामीलाई उपचार

अस्पतालमा सेवा विस्तारसँगै बिरामीको चापसमेत बढ्दै गएको छ। हाल दैनिक १ हजार १०० भन्दा बढी बिरामीले अस्पतालबाट उपचार सेवा लिइरहेको नगर प्रमुख श्रेष्ठले जानकारी दिनुभयो।

उहाँका अनुसार अस्पतालले घरदैलो स्वास्थ्य सेवा सञ्चालन गर्नुका साथै पोर्टेबल अल्ट्रासाउन्ड मेसिनमार्फत विभिन्न वडामा पुगेर सेवा दिँदै आएको छ। चाँगुनारायण अस्पतालमा समेत विशेषज्ञ सेवा उपलब्ध गराउँदै आएको अस्पतालले सामुदायिक स्वास्थ्य सेवामा आफ्नो भूमिका विस्तार गरेको उहाँको भनाइ छ।

नगर प्रमुख श्रेष्ठले अस्पतालले स्वास्थ्य बीमाअन्तर्गत दाबी गर्ने अस्पतालमध्ये पाँचौँ ठूलो अस्पतालको पहिचान बनाएको उल्लेख गर्दै आगामी दिनमा थप विशेषज्ञ सेवा विस्तार गरिने बताउनुभयो।

घाटाबाट नाफातर्फ अस्पताल

कार्यक्रममा मध्यपुरथिमि नगरपालिकाका उपप्रमुख विजयकृष्ण श्रेष्ठले चार वर्षअघिसम्म घाटामा सञ्चालन भइरहेको अस्पताल अहिले गुणस्तरीय सेवा र सुविधा विस्तारका कारण नाफामा पुगेको बताउनुभयो।

अस्पताललाई विशिष्टीकृत स्वास्थ्य संस्थाका रूपमा विकास गर्ने लक्ष्य रहेको उल्लेख गर्दै उहाँले आईसीयू सेवा सञ्चालनले सघन उपचार नपाएर बिरामीले ज्यान गुमाउनुपर्ने जोखिम कम गर्न सहयोग पुग्ने विश्वास व्यक्त गर्नुभयो। उहाँले अस्पताललाई देशकै उत्कृष्ट स्वास्थ्य संस्थामध्ये एक बनाउने लक्ष्य रहेको बताउनुभयो।

१५ शैयाको अत्याधुनिक आईसीयू, प्रस्तावित मुटुरोग सेवा र निर्माणाधीन नयाँ भवनसँगै नेपाल–कोरिया मैत्री नगरपालिका अस्पतालले स्थानीयस्तरमै गुणस्तरीय र विशेषज्ञ स्वास्थ्य सेवा उपलब्ध गराउने लक्ष्यलाई थप अघि बढाएको छ।