२० आश्विन २०८३, मंगलवार
२० असोज भक्तपुर। सूर्यविनायक नगरपालिका–क्षेत्रमा सञ्चालित विभिन्न मासु पसलहरुमा बिग्रिएको तथा खान अयोग्य मासु फेला परेको छ । त्यस्तै नगरपालिकाभित्र संचालित मासु पसलहरुमा पनि अखाद्य सामाग्री फेला परेको छ ।
नगरपालिकाको बजार अनुगमन टोलीले नगरभित्र संचालित पसलहरुको अनुगमनका क्रममा म्याद गुज्रिएका, अखाद्य तथा मापदण्ड विपरितका सामाग्रीहरु भेटिएको हो । नगरपालिकाका उपप्रमुख तथा अनुगमन समिति संयोजक सरिता तिमिल्सिना भट्टराईको नेतृत्वमा रहेको अनुगमन टोलीले त्यस्ता अखाद्य वस्तुहरु जफत गरी जरिवाना समेत गराएको छ ।
नगरपालिकाका कर्मचारीहरूको समेत सहभागिता रहेको अनुगमन टोलीले व्यवसाय सञ्चालनको अवस्था, खाद्यवस्तुको गुणस्तर तथा म्याद, भण्डारण, सरसफाइ र उपभोक्ता हितसँग सम्बन्धित विषयहरूको निरीक्षण गरेको उपप्रमुख सरिता भट्टराइले बताउनु भयो ।
त्यस क्रममा व्यवसाय दर्ता नगरी सञ्चालन गरिरहेका व्यवसायीहरूलाई तत्काल व्यवसाय दर्ता गरी कानुनी प्रक्रियाअनुसार व्यवसाय सञ्चालन गर्न चेतावनी दिइएको छ ।
टोलीले नगरवासी तथा उपभोक्तालाई पनि खाद्यवस्तुको म्याद, गुणस्तर, मूल्य र स्वच्छता जाँच गरेर मात्र खरिद गर्न आग्रह गरेको छ ।
प्रकाशित मिति: २० आश्विन २०८३, मंगलवार
